Судалгааны гол арга зүй нь түүхэн буюу бодит үнэний зарчимд тулгуурласан түүхэн харьцуулалт мөн. Хөндөн буй сэдвийн талаар судлаачдын дэвшүүлсэн санал, төлөвшсөн хандлага, тогтсон үзэл баримтлалын онцлогоор нь тодорхой үеүдэд хуваан багцалж, хэвлэгдсэн бүтээлийн тоон үзүүлэлт, үзэл баримтлалын өөрчлөлтүүдийг өөр хооронд нь жиших замаар харуулахыг оролдов. Түүх бичлэгийн судалгааны шинжлэх ухааны үндсэн ухагдахуун нь судлаачдын дэвшүүлсэн санаа, үзэл баримтлал билээ. Санал нь үзэл бодол, эрдэмтдийн эргэцүүлэл, дэвшүүлсэн таамаглал бол үзэл баримтлал хэмээх ойлголтод саналуудын цогц, гаргалгаа, судалгааны ерөнхий үр дүн, онолын үндэслэл хийгээд баталгаа орно.