Судалгааны эцсийн үр дүн нь Чингис хааны удирдлагын арга барил нь менежментийн онолын мөн чанартай хэрхэн уялдаж буйг харьцуулан шинжлэх тул эхний ээлжид асуудлыг тодорхой болгох чиглэлээр удирдлагын загваруудыг харьцуулан шинжилж, тохирох загварыг сонгох, мөн асуудалд системтэй хандах "хандлагын зураглалууд" хийнэ. Ингэхдээ системийн фильтерийн арга нь шаталсан дүн шинжилгээ хийх замаар асуудлыг нэг бүрчлэн задалж авч үзээд дараа нь синтез буюу бүгдийг нь буцааж угсрах арга зүй юм. Шаталсан дүн шинжилгээний арга нь тухайн асуудал болон тухайн түвшин болгон дээр тохирох арга зүйг нь сонгон анализ хийхэд тус нэмэртэй байдаг. Бид ч бас хэт их мэдээлэл дундаас харьцуулах боломжтой удирдлагуудын арга барил, үйл явдлын өрнөлийг шинжлэн судлахыг зорилгоо болгосон. Үүний тулд морфологийн дүн шинжилгээний аргыг[ Morphological analysis - Болгар гаралтай Шведийн иргэн Фриц Цвикийн зохиосон арга зүй юм.] хэрэглэсэн. Энэхүү аргачлал нь "mess - problem - puzzle" буюу хаос буюу замбараагүй, холилдсон мэдээллүүдээс нэг бүрчлэн асуудал асуудлаар нь ялган салгаж дараа нь асуудал болгон дээр нөхцөл байдлыг нь тодруулаад эцэст нь бүх асуудлуудаа нэг цогц нэгдсэн холбоос бүхий асуудлыг шийдэх цэгцтэй систем болгох загварчлал юм. Үүний үр дүнд утга агуулгатай (логик) асуудлуудыг нэг талд нь авч үзэж утга агуулгагүй (логикгүй) асуудлуудыг нөгөө талд нь авч үзэх замаар асуудлыг цэгцэлсний үр дүнд үндсэн зорилгоо биелүүлсэн болно.